শ্রীকালিকাষ্টকম্
ধ্যানম্ ।
গলদ্রক্তমুণ্ডাবলীকণ্ঠমালা মহোঘোররাবা সুদংষ্ট্রা করালা । বিবস্ত্রা শ্মশানালয়া মুক্তকেশী মহাকালকামাকুলা কালিকেয়ম্ ॥ ১॥
ভুজেবাময়ুগ্মে শিরোঽসিং দধানা বরং দক্ষয়ুগ্মেঽভয়ং বৈ তথৈব । সুমধ্যাঽপি তুঙ্গস্তনা ভারনম্রা লসদ্রক্তসৃক্কদ্বয়া সুস্মিতাস্যা ॥ ২॥ শবদ্বন্দ্বকর্ণাবতংসা সুকেশী লসৎপ্রেতপাণিং প্রয়ুক্তৈককাঞ্চী । শবাকারমঞ্চাধিরূঢা শিবাভিশ্- চতুর্দিক্ষুশব্দায়মানাঽভিরেজে ॥ ৩॥
॥ অথ স্তুতিঃ ॥ বিরঞ্চ্যাদিদেবাস্ত্রয়স্তে গুণাস্ত্রীন্ সমারাধ্য কালীং প্রধানা বভূবুঃ । অনাদিং সুরাদিং মখাদিং ভবাদিং স্বরূপং ৎবদীয়ং ন বিন্দন্তি দেবাঃ ॥ ১॥
জগন্মোহিনীয়ং তু বাগ্বাদিনীয়ং সুহৃৎপোষিণীশত্রুসংহারণীয়ম্ । বচস্তম্ভনীয়ং কিমুচ্চাটনীয়ং স্বরূপং ৎবদীয়ং ন বিন্দন্তি দেবাঃ ২॥
ইয়ং স্বর্গদাত্রী পুনঃ কল্পবল্লী মনোজাস্তু কামান্ যথার্থং প্রকুর্যাৎ । তথা তে কৃতার্থা ভবন্তীতি নিত্যং স্বরূপং ৎবদীয়ং ন বিন্দন্তি দেবাঃ
॥ ৩॥
সুরাপানমত্তা সুভক্তানুরক্তা লসৎপূতচিত্তে সদাবির্ভবত্তে । জপধ্যানপূজাসুধাধৌতপঙ্কা স্বরূপং ৎবদীয়ং ন বিন্দন্তি দেবাঃ
॥ ৪॥
চিদানন্দকন্দং হসন্ মন্দমন্দং শরচ্চন্দ্রকোটিপ্রভাপুঞ্জবিম্বম্ । মুনীনাং কবীনাং হৃদি দ্যোতয়ন্তং স্বরূপং ৎবদীয়ং ন বিন্দন্তি দেবাঃ ॥ ৫॥
মহামেঘকালী সুরক্তাপি শুভ্রা কদাচিদ্ বিচিত্রাকৃতির্যোগমায়া । ন বালা ন বৃদ্ধা ন কামাতুরাপি স্বরূপং ৎবদীয়ং ন বিন্দন্তি দেবাঃ ॥ ৬॥
ক্ষমস্বাপরাধং মহাগুপ্তভাবং ময়া লোকমধ্যে প্রকাশিকৃতং যৎ । তব ধ্যানপূতেন চাপল্যভাবাৎ স্বরূপং ৎবদীয়ং ন বিন্দন্তি দেবাঃ
॥ ৭॥ যদি ধ্যানয়ুক্তং পঠেদ্ যো মনুষ্যস্- তদা সর্বলোকে বিশালো ভবেচ্চ । গৃহে চাষ্টসিদ্ধির্মৃতে চাপি মুক্তিঃ স্বরূপং ৎবদীয়ং ন বিন্দন্তি দেবাঃ ॥ ৮॥ ॥ ইতি শ্রীমচ্ছঙ্করাচার্যবিরচিতং শ্রীকালিকাষ্টকং সম্পূর্ণম্ ॥
){kind=link}